ᐱᔪᓐᓇᖁᖓ: ᓄᓇᕕᒻᒥ ᐱᓇᓱᒐᕐᒥᒃ ᐃᓕᓐᓂᐊᓱᑎᒃ ᐱᒋᐅᕐᓴᓂᖅ
ᒫᑦᔨ 2, 2020-ᒥᑦ ᒫᑦᔨ 12, 2020-ᒧᑦ, ᑕᓪᓕᒪᒋᓕᕐᑕᖓ ᐱᔪᓐᓇᖁᖓ ᐱᓇᓱᐊᕈᓰᓐᓂ ᒪᕐᕉᓂ ᐱᒋᐅᕐᓴᑎᑦᓯᒍᑎᖓ ᓴᓪᓗᓂ ᐊᓂᒎᑎᑦᓯᐊᓚᐅᔪᖅ. 18-ᖑᓚᐅᔪᓂ ᐃᓕᓐᓂᐊᑐᓂ, 9 ᑎᑭᒍᓐᓇᓯᓚᐅᔪᑦ ᓄᓇᕕᒻᒥ ᓇᑭᑐᐃᓐᓇᖅ ᐱᔪᑦ ᐱᔭᕇᕐᓱᑎᓗ ᐱᒋᐅᕐᓴᑎᑦᓯᒍᑎᒥᒃ. ᐱᓇᓱᐊᕈᓰᓐᓂ ᒪᕐᕉᓂ, ᐃᓕᓐᓂᐊᑐᑦ ᐊᒥᓱᓂᒃ ᑲᑎᒪᓂᐊᕈᓯᖃᓚᐅᔪᑦ ᐱᓇᓱᒐᕐᒥ ᐊᑐᐃᓐᓇᐅᒪᓂᕐᒨᓕᖓᔪᓂᒃ, ᐱᓇᓱᒐᖃᕐᓂᒥ ᖃᓄᐃᑦᑑᓂᓕᐅᕐᓂᖅ, ᐱᓇᓱᑦᑎᓯᐊᖑᓂᖅ, ᐃᒻᒥᓂᖅ ᖃᐅᔨᒪᑦᓯᐊᓂᖅ, ᑫᕙᓪᓚᒍᓯᓕᕆᒍᓐᓇᓯᐊᕐᓂᖅ ᐱᓇᓱᒐᕐᒥᓗ ᖃᕆᑕᐅᔭᕈᑎᓕᕆᓃᑦ. ᐱᒋᐅᕐᓴᓂᕐᒧᑦ ᐃᓚᒋᐊᕈᑎᒋᑦᓱᒍ ᑰᑦᔪᐊᒥ ᐊᑑᑎᒋᐊᖃᓚᐅᔪᖅ ᔭᓄᐊᕆ 2020-ᒥ, ᐅᖓᓯᓪᓕᒋᐊᕆᐊᖃᓚᐅᔪᖅ ᐱᒋᐅᕐᓴᑑᑉ ᓇᒻᒥᓂᖅ ᐱᑦᔪᑎᖃᕐᓱᓂ ᖃᓄᐃᑦᑐᒦᓐᓂᖃᕐᓂᖓᓂᒃ, ᒪᕐᕈᕆᐊᓪᓛᒃ ᒫᑦᔨ 2020-ᒥ ᐊᑑᑎᒋᐊᖃᓚᐅᔪᒻᒥᔫᒃ. ᑭᓯᐊᓂ COVID-19 ᓄᐃᓚᐅᔪᒻᒪᑦ, ᐱᔪᓐᓇᖁᖓ ᐅᖓᓯᓪᓖᒋᐊᕆᐊᖃᓚᐅᔪᖅ ᑖᒃᑯᐊ ᐱᒋᐊᖕᖓᓂᖏᓐᓂᒃ ᒪᓐᑐᔨᐊᒥ ᓴᓪᓗᓂᓗ. ᒪᕐᕈᕆᐊᓪᓛᓂᒃ ᓂᕆᐅᓚᐅᔪᒻᒥᔪᑦ ᐱᒋᐅᕐᓴᑎᑦᓯᒍᑏᓐᓂᒃ ᒪᓪᑐᔨᐊᒥ, ᓄᕐᖃᖓᑎᑕᐅᒻᒥᔫᓐᓂᒃ ᒫᓐᓇᐅᓂᖓᓂ ᓱᓕ. ᑌᒣᒐᓗᐊᕐᑎᓗᒋᑦ, ᐅᖄᖃᑎᒌᓐᓂᖃᖃᑦᑕᑐᑦ ᓄᓇᕕᒻᒥ ᓄᓇᒥᒃ ᑎᒍᒥᐊᕐᑎᑯᓐᓂᒃ ᖃᕐᖃᓕᒃᑯᓂᓪᓗ ᓴᓪᓗᓂ ᐊᒻᒪᓗ ᐊᖏᕐᓂᖏᑦ ᐱᔪᓐᓇᖁᖓᒃᑯᓂᒃ ᑎᑭᐅᑎᔭᖃᕈᓐᓇᓯᑎᑦᓯᓚᐅᔪᑦ ᐱᒋᐅᕐᓴᑎᑦᓯᒍᑎᓂᒃ ᐊᓕᐊᓇᕐᑐᓂᒃ ᒪᓐᑐᔨᐊᒥ ᓴᓪᓗᓂᓗ.
ᖃᓂᒪᓐᓇᖅ COVID-19 ᓱᕐᕃᓯᒪᕗᖅ ᐱᔪᓐᓇᖁᖓᒃᑯᑦ ᐱᒋᐅᕐᓴᑎᑦᓯᒍᑎᖏᓐᓂᒃ ᐁᓯᒪᓪᓚᕆᑦᓱᓂᓗ ᐃᓕᓐᓂᐊᑐᑦᓴᓯᐅᕐᓃᑦ ᖃᓄᐃᓘᕐᑕᐅᓂᖏᓐᓂᒃ ᓴᓗᒣᓐᓇᕆᐊᖃᕐᓂᐅᑉ ᒪᓕᒐᖏᑦ ᐱᑦᔪᑎᒋᑦᓱᒋᑦ ᐅᖓᓯᓪᓕᒋᐊᕆᓚᕿᕈᑎᒋᓚᐅᔪᔭᑦᑎᓂ ᖃᖓᒧᑦ ᑎᑭᓪᓗᒍ ᓱᕐᖁᐃᓯᒪᓇᒍ. ᑌᒣᒐᓗᐊᕐᑎᓗᒍ, ᐱᔪᓐᓇᖁᖓ ᐱᓇᓱᑦᑎᖏᑦ ᐱᓇᓱᐊᕐᓂᖃᕈᓐᓇᒪᖓ ᖃᓂᖕᖏᑐᒦᒐᓗᐊᕈᑎᒃ, ᐱᔭᕇᕈᓐᓇᓯᓚᐅᔪᑦ ᐱᒋᐅᕐᓴᑎᑦᓯᒍᑎᓂᒃ ᐸᕐᓀᕈᓐᓇᓯᑦᓱᑎᓗ ᐱᒋᐅᕐᓴᑐᑦᓴᓯᐅᕐᓂᐅᓛᕐᑐᒧᑦ. ᐊᓃᒋᐊᖃᖕᖏᓂᖅ ᐱᓇᓱᑦᑎᓂᒃ ᑭᖑᕙᕆᐊᕐᑎᓯᓚᐅᔪᖅ ᐃᓱᒪᑦᓴᓯᐅᕈᓐᓇᓯᑎᑦᓯᓱᓂᓗ ᖃᓄᖅ ᐱᐅᓯᐅᒥᒋᐊᕈᓐᓇᒪᖔᑦ ᐱᒋᐅᕐᓴᑎᑦᓯᒍᑎ ᓯᕗᓂᕐᒥ. ᑌᒣᑦᑐᒦᓐᓂᑎᓐᓂ ᕿᒥᕐᕈᕆᐊᓪᓈᓂᖃᖃᑦᑕᑐᒍᑦ, ᓱᕐᖁᐃᓯᒋᐊᕐᓱᑕ ᐱᐅᓯᐅᒥᒋᐊᕐᑎᓯᑦᓱᑕᓗ ᓇᐅᑦᓯᑑᑎᑦᑎᓂᒃ, ᖃᓄᐃᓘᕈᓯᑦᑎᓂᒃ ᐳᕐᑐᓂᖃᕈᑎᖏᑦᑕᓗ ᐋᕐᕿᓯᒪᐅᑎᖏᓐᓂᒃ, ᐱᒋᐅᕐᓴᑎᑦᓯᒍᑎᑦᑕᓗ ᐃᓗᓕᑦᑕᖏᓐᓂᒃ.
ᒣ 2020-ᒥᓂᑦ, ᐱᔪᓐᓇᖁᖓ ᐱᒋᐅᕐᓴᑎᑦᓯᒍᑎᖓ ᐱᒋᐅᕐᓴᑐᑦᓴᓯᐅᕐᓂᒦᑦᑐᖅ. Facebook-ᑯᑦ ᓴᕐᕿᑎᑦᓯᖃᑦᑕᓱᖓ ᐃᓄᓐᓂᓗ ᓄᓇᕕᒻᒥ ᖃᐅᔨᑎᑦᓯᒐᓱᐊᕐᓱᑕ ᐱᐅᔫᒐᔭᕐᓂᖓᓂᒃ ᐊᑎᒥᓂᒃ ᑐᓂᓯᖃᑦᑕᑐᐊᕈᑎᒃ ᐃᓚᒋᔭᐅᓯᓗᑎᓗ ᐱᔪᓐᓇᖁᖓᒃᑯᓄᑦ! ᐊᓪᓚᕖᑦ ᐅᒃᑯᐃᐸᓪᓕᐊᓕᕐᑎᓗᒋᑦ, ᐱᒋᐊᕐᑎᓯᒋᐊᓪᓚᕈᓐᓇᓛᕈᒪᕗᒍᑦ ᐱᒋᐅᕐᓴᑎᑦᓯᒍᑎᑦᑎᓂᒃ ᖃᒻᒥᑯᑦ. ᑐᓴᐅᒪᑦᓯᐊᖃᑦᑕᓂᐊᕋᑦᓯ Facebook-ᕗᑦ ᑕᑯᒋᐊᕐᑕᐅᖃᑦᑕᓕ!